par 
Nan yon entèvyou Fernando Estime reyalize avèk yon ayisyen ki ap viv an Ostrali, li pa kache fristasyon li pou l kritike jan ni boujwa ni dirijan Ayiti pa entèrese ak enterè Ayiti. Tout peyi yo debake ak tout piblik yo, esponnsò yo, tout gwo biznis yo, Ayiti vini pou kont li.
Gytho Millien ki se moun Tigwav nan depatman lwès peyi a k ap viv Ostrali eksplike jan gouvènman te kapab pwofite rantre anpil lajan nan moman koup dimond lan. Se yon desepsyon pou ni Boujwa ni dirijan yo pa envesti nan seleksyon an, ni vin sipòte medam yo nan konpetisyon an.
Malgre tout eksplwa medam yo ap fè malgre jan lemond fokis sou yo, ni boujwa yo ni dirijan yo pa pran konsyans pou yo envesti nan foutbòl la, menm yon bann ayisyèn pa vini pou chofe seleksyon an.
Millien fè konnen tout ayisyen kèlkeswa lòt nasyonalite ou pran w ap rete ayisyen depi w fè yon bagay ki grav se lakay ou yo ap voye ou, yon sèl kote ou genyen vrèman se rasin ou se kote w soti, se yon obligasyon lè w se ayisyen pou w sipòte lakay ou, pou w renmen lakay ou pou w ede lakay ou avanse.
