par Byenvini nan peyi dayiti, kote w kapab lakay ou, nan travay ou oubyen anndan legliz w ap chèche yon moman entimite ak konsantrasyon oubyen repo… epi san zatann yon mobil sonò kapab twouble w e trouble lespri w. Kiyès ki gen tò? Kiyès ki gen rezon?
Se sijè sa a, nou deside pale jidya nan rekasyon Fernando Live News (FNL).
San kontrenn, lib e libè, Mobil sa a pran lari swa pou l fe piblisite pou yon gwo enstitisyon komèsyal tankou yon Mikwo kredi kap lanse yon nouvo pwodwi, ki kapab labank, konpayi kap vann bwason oubyen yon konpayi telefoni mobil… pwoblèm nan pa chita totalman sou do enstitisyon nou sot site yo, paske se kapab pou yon sezon ( konjonkti) men se pito yon dividal antreprenè, ki pa souvan sètifye e ki pa konn ni lè, ni dat. Prensipal objektif yo se lavant ak larant. Moun sa yo sèvi ak feblès lEta ki depi kèk tan pèdi dwa kontwòl ak règlemantasyon mache a. Fas ak yon popilasyon ak fèb reveni e san konpetans, yo enskri tèt yo nan yon demach pou pwomosyon pwodwi natirèl pou yo vann tout kalte miksti ki kap geri tout maladi.
San’n pap pote jijman, nap jis kesyone wòl kèk enstitisyon tankou Ministè sante piblik, ministè komès ak endistri ki ta dwe la pou reglemante mache a, ministè kominikasyon ki dwe veye ak sak di e san nou pap bliye Ministè jistis ki se manman lalwa ki déja tranche sou sak gen pou wè ak twoub lòd piblik epi fosè.
Konsa, pandan tout jounen, e prèske nan tout zòn, wap tande : Gason ki pa gen bann, Gason kap fè bèk atè, avanse nan machine nan, wap mande ###. Ou menm ki paka manje, ou menm ki gen doulè, fredite, Asid, bil, gaz, vant fè mal, moum ki paka fè pitit, ti moun kipaka aprann lekol avanse nan machin nan… E sak pi tris la, yo menm vann remed pou geri kout poud, kout lè e menm chase movèz espri.
Epi, Moun ou pata panse avanse sou machin nan vre swa pou yo achte, swa pou yo goute.
Tankou bon vandè ak konpetans inivesitè, yo aplike ak siksè prensip « AIDA » ki trete sou dosye vant ak marketing. Attirer l’attention, susciter l’Interet, augmenter le Desir et conclure l’Achat. Avanw achte, yo pwopozew eseye, yo fèw eseye yon pwodwi pandan yap vann ou youn ak menm anbalaj la men ki mwens efikas. Siw ta bezwen gate sa a, mta renmen ou pwopose yon pri doub pou pwodwi esè a, e la a wap rive konprann nivo anak yo.
Gran ekonis save yo, sou platfòm yo pran lapawòl pou envite moun devlope fakilte yo pou yo kreyasyon antrepriz, kreyasyon richès ak anplwa nan lide pou ede ranfòse pwodiksyon lokal la pou yon pi bon to kwasans. Se tap yon bon bagay, si moun sa yo tap pwodwi nan nivo estanda ak repè deyontoloji ak etik. Paske se yon dwa sakre tout moun genyen pou yo egzèse fakilte yo men tou se yon devwa pou yo respekti prensip ak etik.
Depi lane 90, peyi d’Ayiti ap ekperimante sistèm demokratik la, ki defini tankou diktati lwa yo.
Vann pa yon deli e ni yon krim men lèw ma respekte nan ki kondisyon pou vann tankou twouble lapè piblik, pa respeke dosaj ou vann fo pwodwi ak pwodwi ki varye… ou vin otomatikman nan kontravansyon ak lalwa e lalwa pini fosè.
Peyi d’Ayiti pa yon peyi espesyal ou dimwens yon bout tè sou kote. Fòk nou komanse devlope atitid respè ki aplike nan tout lot sosyete yo sè yo.
Se vre nou kapab konprann to chomaj la chak jou ap vale teren ak tout enflasyon an; pouvwa d’acha ak to d’kwasans yo kap chite chak ane san konte. Men fòk nou pa bliye prensip de baz ak demokratik yo ki bay dwa ak tout moun nan limit youn pou lot.
Se pou sa a, depi lantikite, ene yo te konsevwa espas piblik tankou : mache, plas piblik, estad ak diskotèk pou moun pale ak fè bri san mezire. Men yon lòt kote, yo konsevwa konsèp espas prive ak rezidansyèl yo ki pa dwe twouble sou okenn preteks.
Kit ou tap van kit ou ap achte… Ann konstwi yon kad legal nan itilize espas pi fèt pou sa a.
Pa di’m ou poko tande bò lakay ou: Kabann anfè, matla box, vye batri, vye blenndè… map achte yo!
