par Konbit Òganizasyon Politik Sendikal ak Popilè a denonse fason gwoup politik PHTK Matelis ak Jovnelis yo ap itilize vyolans gang yo ak teworis yo nan peyi a pou defann kòz Martine Moïse ak Laurent Salvador Lamothe.
De move branch sa yo mete ansanm pou detwi peyi a, fini avè l ti kal pa ti kal, demoli l pak an pak.
Pèp ayisyen dwe rete vijilan. Fòk nou derasinen tou de branch PHTK sa yo sou sèn politik la. Daprè Konbit Òganizasyon Politik Sendikal ak Popilè a, yon pati nan ansyen opozisyon an rejwenn Ariel Henry ki tou vle di Michel Martelly; Jovnelis yo, yo menm yo rete byen sinik pou yo pouri peyi a.
Yo pwovoke kriz gaz la sou teritwa nasyonal la.
Martine Moïse ak Laurent Lamothe antann yo ak gwoup gang G-9 la pou yo mennen konba yo.
Daprè asosiyasyon an peyi a dwe retire tèt li nan gè sa.
Gaz la se yon chan yo eksplwate pou yo fè blanchiman lajan
Konbit Òganizasyon Politik Sendikal ak Popilè a anonse mobilizasyon pou denonse alye PHTK yo pral reprann. “Yon seri gang ki gen otorite finansye ap goumen pou se yo ki kontwole komès gaz la.”
Konbit la fè yon rapèl de Pandora Papers la, yon ankèt ki te fèt sou kesyon evazyon fiskal. Li prezante Jovenel Moïse, Michel Martelly ak Laurent S. Lamothe kòm twa pi gran koriptè, nan dènye tan sa yo. Daprè li, twa pèsonalite sa yo ta detounen anviwon yon milya dola ameriken.
Li fè konnen Jovenel Moïse detounen 257 milyon dola, Michel Martelly 300 milyon, epi Laurent S. Lamothe 400 milyon. Yo seche [kès leta epi yo redui bidjè peyi a pi ba posib nan piye anviwon 50% bidjè nasyonal la.
Daprè Konbit la, pa genyen dout sou sa, kantite ponp gazolin yo ki ap ogmante a kache dèyè l yon estrateji blanchiman lajan pou PHTK. Sa vin ogmante nesesite pou achte pi plis kantite gaz.
Ogmantasyon ponp gaz yo melanje ak ti kantite gaz yo jwenn nan chak kòmann yo patisipe nan rann gaz la ra a.
Konbit Òganizasyon Politik Sendikal ak Popilè a avèti nou genyen menas pou peyi a kraze nèt si fòs pwogresis yo pa mete fren sou move manigans de gwoup PHTK yo ap fè sou peyi a.
