par Sa fè prèske yon lane depi Fanm Eklere kanpe bò kote medam yo pou ba yo bon jan asistans. Anpil nan nou ka tande pale de strikti sa a, swa nan videyo layv yo fè pou louvri je medam yo sou kèk nosyon, swa nan fòmasyon y ap ba yo, swa tou, nan kèk inisyativ yo mete sou pye pou ba yo kout men. Jounen jodi a, Fanm Eklere deside bay fanm yo lebra yon lòt jan ak yon lòt inisyativ: Pwogram Solidarite.
Pwogram Solidarite a se yon kokenn chenn inisyativ Fanm Eklere mete sou pye, kote l ap ankouraje medam antreprenè yo ak bouste biznis yo genyen. Gras ak sipò plizyè donatè, Pwogram Solidarite manm responsab Fanm Eklere yo prete fanm sa yo yon kantite lajan pou ede yo agrandi biznis yo genyen.
Sèt (7) fanm gentan benefisye de pwogram sa ki demare nan mwa oktòb 2021 an. Pwosesis pou w rive jwenn kout men sa senp. Fanm Eklere mete yon lyen ki disponib, kote ou ranpli yon fòmilè k ap detèmine si w elijib pou w youn nan benefisyè yo. Sèt (7) moun responsab yo chwazi yo, resevwa yon apèl konfimasyon, aprèsa yo siyen yon kontra, epi pou yo resevwa lajan yo.
Non sèlman pwogram nan bay biznis medam yo jarèt, men tou, li ba yo avantaj bab ak moustach. Medam yo gen posibilite pou yo remèt lajan an sou yon peryòd ki ale ant 12 a 18 mwa, anpitou yo pa gen okenn enterè y ap bay sou lajan sa a.
Anplis de lajan medam yo ap resevwa a, y ap gen pou yo patisipe tou nan fòmasyon Fanm Eklere gen pou l bay, sou divès kalte domèn ak tematik. Men tou, y ap gen pou yo sèvi ajan pwomosyon pou gwoup Fanm Eklere a, spesyalman pou pale de pwogram nan.
Sèt lòt fanm pral benefisye de pwogram nan pou mwa novanm nan. Fanm Eklere ap devwale non yo 30 novanm k ap vini la.
Pwogram Solidarite Fanm Eklere: yon lajan prete, pou yon bon kòz!
Chapo ba pou Cottecheese Pierre ak tout ekip ki kanpe dèyè inisyativ sa a.
