par 
Jou kite 23 jwiyè a, antèman ansyen prezidan Jovenel Moïse lan te fèt nan depatman nò peyi a jan sa te anonse. Anpil grandèt te asiste seremoni sila a. Men youn nan bagay ki ta ka fè moun sezi se absans Miki. Parenn te chwazi pou l tchwipe kadav fiyèl li devan de grenn je tout moun. Éske sa ta vle di chèf bandi legal la ta konplis nan lanmò nèg kouran 24 sou 24 la. Oubyen l ap fè pridans ki fè l te pito pentad konsa a? Fanmi nèg fo bannann nan kache tout wont anba bwa yo pou prezante mò a ak tout fyète. Ki fyète souple ? Adye wi dan !
Anpil diskou pawòl van farinen ak pawòl ki gan move lòdè santi di. Yon seri pawòl ki abiye ak langaj wa Salomon. Kòmkidire mouche Jovenel t ap travay pou chanje lavi moun ki pi mal yo. Poutan Matisan, nan depatman kote l te abite a, gwoup gang li federe yo ap simaye kadav 24/24 depi 2 mwa. Tout moun oblije kouri kite lakay yo ak tout sa yo te ganyen. Lamizè vin 4 fwa ap ravaje zantray yo. Depi prèske 2 mwa katye Matisan vid tankou vil Alèp nan peyi Lasiri. Moun mouri pa pil pa pakèt. Katouch zam fann fwa fè kenken pandanstan Matisan toupre palè Larepiblik la. E se la Jovenel t ap kale kò l chak jou.
Ansyen prezidan wondonmon an, mouri sasinen depi 7 jiyè 2021. E antèman l rive fèt 17 jou aprè. Yo sasinen l menmjan ak anpil moun ki te sasinen pandan li te prezidan an. Sonje batonye Monferrier Dorval ak lòt ankò ki mouri anba de twou nen l. Baryè a rete byen louvri, byen gran, men lajè. Kiyès ki jeran k ap louvri bay ? Kiyès ki patwon an ki pou di louvri ? 2022 pa lwen rive. Arete pou eleksyon gen tan sòti. Dechaj pou tout premye minis ak minis ki pase depi nan lanne 1991 pou rive 2017. Dechay sa a yo simaye alagouj.
Nèg 25 estad la anfas Nèg tèt san cheve yo. Si n byen tande diskou madan Apredye ta sanble l pral pran chans li tou nan piyay 16 jen an. Match la ta sanble ka di e l ka santi di tou. E se yon frekansite. E frekansite sa a koute nonm fo bannann chè a e li peye l byen chè. E se mal sele k ap mal foule tou.
Ayiti nou vle a, anpil moun reve l jan Dany Laferrier reve l lan. Men katchapika lamizè jwenn mwayen fware angrenay li. Manje nan asyèt. Nad marinad. Kidnapin nan tout zòn. Ensekirite blayi tout kote menm ata Pèleren 5 li touche, kay ansyen chèf Leta a. Sonje l te deklare: «Aprè Bondye se mwen». Sekirite pa sekirize. An!!! Li kase kòd. Di m non, kiyès ki mèt kabrit lan ? Kiyès ki rann kabrit lan konsa ? Antouka, kite ranvwa ale men l te dwe jije e kondane pou tout zak li te fè yo ! Jovenel ale se vre. Men se Ayiti ki pèdi. Ayiti pèdi Kòb Petwo a. Jovenel ale men Ayiti pèdi mago Agritrans lan, kòb Betèks la elatriye.
MDV / Fernando Live
