Ariel Henry se yon premye minis defakto k ap jere jwèt tè

” Jwèt Tè Ariel Henry ap dirije a , se pwojè demokrasi Pèpè ki prezante nan anvlòp USAID-BID-Bank Mondyal- FMI an. Leta sa a dwe transfòme pou nou tou rezoud pwoblèm yo pandan Nou nan Jwèt Tè a” .

Nan diskou li fè kòm parenn devan pwomosyon ” Feniks Jean Léopold Dominique” kote 86 jèn fanm ak jen gason ki t ap resevwa diplòm yo nan Institut Supérieur Banatte de Communication (ISBACOM) , yon lekòl siperyè jounalis Banatte Daniel ap dirije, Reskonsab Konplèks Salon Sosyal la mete Ariel Henry toutouni nan montre manipilasyon l ap fè nan pi wo nivo nan Leta a pou Ayiti rete nan jwèt Tè.

Pandan li itilize karikati pwòp ekspresyon Premye Minis ki konsantre tout pouvwa repibliken yo nan men li an- Ariel Henry- ki te di : ” Se jwèt Tè , se distraksyon pou l te pase nan rizib demach Mache kontrè ak kole zepòl lòt gwoup politik kouwè Akò Montana t ap fè.

Envestisè Sosyal la lonje dwèt sou sans manfouben, kite mele, sankoutcha

“Arnel Bélizaire pran bal ; moun ap mouri pa si pala ; kidnapin fè mikalaw ; Ariel Henry di tou sa se jwèt Tè; se distraksyon. Enben, nou dwe tou pwofite rezoud pwòblèm Ayiti pandan nou nan jwèt Tè a”, deklarasyon Jimmy Pierre.

Jimmy Pierre longe dwèt yon lòt pa, sou absans mekanis repwodiksyon sosyal ki pou fè yon jèn pwofesyonèl reyalize tèt li. Se pou sa li felisite kouraj paran jèn Sila yo ak estaf ISBACOM nan ki bay jèn yo zouti pou yo ta chèche lavi san yo pa nan gang.

Men li ensiste sou sa: ” Gen jèn ki nan gang ki gen metye. Iscard pa egzanp ki se yon prezime chèf gang se yon jèn nan Site Solèy ki te nan fakilte epi ki te pwofesè lekòl. Sa vle di akonpayman pou jèn yo jwen nan dwe kenbe kont non selman metye, men pi globalman dwe kreye posiblite pou
tout jèn -kelkelanswa orijin sosyal li- jwi menm chans reyisi nan lavi. Pou sa , Leta dwe konbat komsadwa tout sous inegalite yo ,kòmanse nan mete lekòl ak metye disponib .

Jiris la mande tou : ” Pandan Nou ap sakrifye timoun jenerasyon 2000 yo, ki sa n ap fè pou yo pa nan gang nan ane k ap vini yo? Moun ki nan gang Jodi a te timoun nan ane 2000 .

“Malandren fanm ak gazon ki pase nan tèt Leta a 35 dènye ane sa yo konstwi yon aparèy jistis ki pa rive bay Jean Dominique jistis 22 zan aprè,epi Nou ap tann menm aparèy jistis sa a bay Mèt Dorval, Brignol Lindor, Néhémie Joseph AK Jovenel Moïse jistis”

Jimmy Pierre te felisite kouraj jèn gradye yo epi evite yo byen analize Kote y ap met pye yo nan reyalite politik malouk nou twouve nou an .

Gémina Jn Baptiste